MARIGLEN KUME/ Grupi Parlamentar i Partisë Demokratike kërkoi deklasifikimin si sekrete shtetërore të gjithë dosjeve të ish-Sigurimit të Shtetit nga viti 1944 deri në 1991.
Deputeti Kreshnik Çollaku tha për shtypin se tashmë kanë kaluar 31 vite nga rënia e regjimit komunist dhe qytetarët shqiptarë kanë të drejtë të mësojnë të vërtetën e diktaturës më të egër dhe më çnjerëzore në historinë e Shqipërisë dhe të Europës. Ai theksoi se pa ndriçimin e veprimtarisë së Sigurimit të Shtetit nuk mund të arrihet zbardhja e plotë e së vërtetës mbi regjimin komunist, sepse Sigurimi ishte struktura kryesore e atij shteti diktatorial.
“Në ato dokumente gjenden të dhëna dhe foto për fatin e mijëra shqiptarëve të pushkatuar, të gjymtuar, të torturuar, të dënuar dhe internuar në burgjet dhe kampet e regjimit komunist. Zbardhja e atyre dokumenteve do t’iu shërbejë këtyre personave, por edhe familjeve të tyre për të mësuar të vërtetën e dhimbshme të asaj që ishte jeta e tyre për 45 vite. Në këtë kuptim, ky projektligj realizon një të drejtë thelbësore për këta individë, që është e drejta për të mësuar të vërtetën e jetës dhe familjes së tyre deri në fund” tha zoti Çollaku. Historia 31- vjeçare postkomuniste, shtoi zoti Çollaku, provuar se shqiptarët nuk janë hakmarrës, nuk kërkojnë shpagim, nuk urrejnë, por kërkojnë të dinë të vërtetën e plotë të jetës së tye nën diktaturën komuniste.
NISMA E PS-SË
Më herët doli në një deklaratë për mediat edhe kryetarja e Komisionit të Ligjeve, deputetja e PS-së Klotilda Bushka. Ajo kërkoi që Autoriteti për Informim mbi Dokumentet e ish-Sigurimit të Shtetit të ketë lirinë e verifikimit të pastërtisë së zyrtarëve dhe kandidatëve për deputetë dhe kryebashkiakë, sa herë që ka zgjedhje, edhe nëse ata kanë marrë më herët certifikata të pastërtisë së figurës. Nismat e Partisë Socialiste bazohen në propozimet e Autoritetit për Informim mbi Dokumentet e ish-Sigurimit të Shtetit (AIDSSH) drejtuar kryetares së Kuvendit lidhur me pastërtinë e figurës së personave të zgjedhur apo të emëruar.
“Dy nismat tona ligjore konsistojnë në krijimin e shtratit ligjor për verifikimin e subjekteve pavarësisht nëse kanë ose jo një certifikatë të mëparshme pastërtie nën dritën e fakteve dhe së vërtetës si dhe për verifikimin e të gjitha subjekteve që zgjidhen apo emërohen në poste publike mbi pastërtinë e figurës së tyre. Zbardhja e së vërtetës për personat që ushtrojnë detyra shtetërore, mbi të gjitha për ata persona që kanë pasur dhe kanë detyra të larta shtetërore është një domosdoshmëri dhe një simbolikë e fuqishme për të dënuar krimet e të kaluarës por padyshim në funksion të së tashmes për krijimin e një shoqërie të bazuar në parimet dhe vlerat demokratike”, tha deputetja socialiste, Klotilda Bushka.
Ajo shtoi se në letrën e Autoritetit të Dosjeve drejtuar Kuvendit, përmenden figura të rëndësishme të shtetit të pajisur me certifikatën e pastërtisë së figurës, por në fakt rezultojnë në dokumentet e krijuara të ish-Sigurimit të Shtetit, ndaj duhen hequr pengesat dhe boshllëqet ligjore për një transparencë të plotë.
Panorama.al